Ninka Shimbiraha

 

Kani waa Rodgers Oloo Magutha,  waa 27 jir dadku ugu yeeraan Ninka Shimbiraha, waxay qaarkood u tartamaan inay sawir la galaan.

Ninkan ayaa ku dhashay magaalada Nakuru. Wuxuu jeclaa inuu si qarsoodi ah ugu dhuunto kaynta hareerta Harada Nakuru si uu u daawado shimbiraha.

Carruurnimadiisii hore wuxuu ka duwanaa asxaabtiisa oo shimbiraha ku toogan jiray dhagxaan, isagoo halkii ka baray inay ilaaliyaan.

Laakiin nasiib-darro, markii hooyadiis si lama filaan ah u geeriyootay isagoo 13 jir ah, noloshiisii way is beddeshay. Wuxuu noqday ilmo waddo-joog ah, magaalooyin badan ayuu u wareegay, ugu dambayna wuxuu degay waddooyinka Nairobi.

Magutha wuxuu ku tilmaamaa nolosha waddada “meel ay ku kulmaan dadka ayaanka daran” agoon, kuwa ka soo cararay guryaha rabshadaha leh, iyo in kale oo aan lahayn cid ay u laabtaan.

Halkaas ayuu ka helay “qoys beddel ah” oo ka kooban carruur iyo dhalinyaro kale oo waddooyinka ku nool, kuwaas oo uu la wadaago cuntada iyo hoyga. Wuxuu isku dayay inuu ku abuuro rajo, isagoo baraya carruurta yar-yar akhriska iyo qorista.

Isbeddelka noloshiisa wuxuu yimid markii uu helay shinbir  dhaawacan, taas oo uu u bixiyay Johnson. Wuu daryeelay, waxayna noqdeen lama kala maarmaan – calaamad rajo ah oo ka dhalatay nolosha adag.

Magutha, oo loo yaqaan “Ninka Shimbiraha”, wuxuu ahaa qof aan la aqoon ilaa sannadkii 2024, markii ay Nairobi ka dhaceen mudaharaadyo waaweyn oo ka dhan ahaa sicir-bararka iyo musuqmaasuqa.

Wuxuu ka dhex muuqday dadka mudaaharaadaya isagoo ay hareer socdaan shimbirihiisa, sawiradiisina waxay si weyn ugu faafeen baraha bulshada. Si lama filaan ah, wuxuu noqday astaan u taagan kacdoonka shacabka.

Wuxuu la kulmay jirdil. Intii uu dhulka yaallay, shimbirihiisii waxay ku sii dhegganaayeen garbihiisa, iyagoo aan ka tegin.

Inkastoo uu caan noqday, noloshiisii ma aysan is beddelin: weli wuxuu raadinayaa cunto, wuxuu seexdaa waddooyinka, wuxuuna mararka qaar la kulmaa xasillooni darro uu ka dhex dareemo saaxiibbadiisii waddada, kuwaas oo u maleeyay inuu lacag badan helay, kaddib caanimadiisa.

Maanta, Magutha wuxuu ku nool yahay xaafad sabool ah oo ku taalla duleedka Nairobi. Wuxuu nolol maalmeedkiisa ka raadsadaa uruurinta balaastigga qashinka si uu u quudiyo shimbirihiisa.

Laakiin riyadiisa weli way nool shahay – inuu dhiso xarun isku keenta carruurta waddooyinka iyo shimbiraha dhaawacan; meel ay carruurtu wax ku bartaan, cunto ka helaan, isla markaana bartaan naxariista iyo daryeelka dabeecadda.

Isagoo qosolaya ayuu leeyahay:

“Shimbiruhu waxay nagu qasbeen in dadku na arkaan. Riyada aan leeyahay waa in bulshada waddooyinka la arko, oo naloo arko bini’aadam – ee aanan loo arkin khatar.”